موسمیاتی تبدیلی سے نمٹنے کیلئے پیشگی اقدامات ناگزیر ہیں: مصدق ملک

وفاقی وزیر برائے موسمیاتی تبدیلی ڈاکٹر مصدق ملک نے خبردار کیا ہے کہ موسمیاتی تبدیلی وقت گزرنے کے ساتھ ایک انتہائی سنگین چیلنج بنتی جا رہی ہے، جس سے نمٹنے کے لیے پیشگی اقدامات ناگزیر ہیں۔ زیرزمین آبی ذخائر کے تحفظ سے متعلق ایک تقریب سے خطاب کرتے ہوئے انہوں نے کہا کہ پاکستان میں صاف زیرزمین پانی کے ذخائر تیزی سے کم ہو رہے ہیں، اس لیے پانی کا تحفظ ہماری اولین ترجیح اور ریڈ لائن ہے۔ انہوں نے بارش کے پانی کو ضائع ہونے سے بچانے کے لیے عملی اقدامات پر زور دیتے ہوئے کہا کہ اسلام آباد کے بڑے ڈیمز پانی ذخیرہ کرنے کا اہم ذریعہ ہیں جنہیں آلودگی سے محفوظ بنانا ہوگا۔ وفاقی وزیر نے شہریوں سے بھی اپیل کی کہ وہ پانی کے بے دریغ استعمال اور اسے آلودہ کرنے سے سختی سے گریز کریں۔