سانحہ پمز کی جوڈیشل انکوائری کی درخواست، حکومت سے تفصیلی جواب طلب

اسلام آباد ہائیکورٹ نے پمز اسپتال میں 14 بچوں کے جاں بحق ہونے کے ہولناک واقعے پر دائر درخواست کی سماعت کرتے ہوئے وفاقی حکومت سے وزیراعظم کو پیش کی گئی انکوائری رپورٹ اور اب تک کی گئی کارروائی کی تفصیلی رپورٹ طلب کر لی ہے۔ چیف جسٹس سرفراز ڈوگر نے کیس کی سماعت کے دوران واقعے کو انتہائی خوفناک قرار دیتے ہوئے استفسار کیا کہ اس معاملے میں ذمہ داری کس پر عائد کی گئی ہے۔ درخواست گزار کے وکیل نے بیوروکریٹس پر مشتمل انکوائری کمیٹی کی شفافیت پر سوالات اٹھائے اور ایگزیکٹو ڈائریکٹر پمز کے خلاف کارروائی کا مطالبہ کیا۔ ایڈیشنل اٹارنی جنرل نے عدالت کو بتایا کہ سیکرٹری صحت اور پمز کے متعدد حکام کو معطل کیا جا چکا ہے اور مکمل رپورٹ 5 دنوں میں جمع کرائی جائے گی۔ عدالت نے حکومت کو ذمے داری کے تعین اور اٹھائے گئے تمام اقدامات پر مشتمل رپورٹ پیش کرنے کی ہدایت جاری کر دی ہے۔