کم عمربچوں کے سوشل میڈیا استعمال کو ریگولیٹ کرنے کی درخواست پر نوٹس

اسلام آباد ہائیکورٹ نے 16 سال سے کم عمر بچوں کے سوشل میڈیا استعمال کو ریگولیٹ کرنے اور انہیں ڈیجیٹل خطرات سے بچانے سے متعلق درخواست پر اہم پیش رفت کرتے ہوئے وفاقی وزارتوں اور متعلقہ اداروں سے جواب طلب کر لیا ہے۔ چیف جسٹس سرفراز ڈوگر نے کیس کی سماعت کی، جس میں 16 سال سے کم عمر بچوں کے سوشل میڈیا اکاؤنٹس کے لیے عمر کی تصدیق کا مؤثر نظام قائم کرنے اور باضابطہ قانون سازی کی استدعا کی گئی ہے۔ درخواست گزار کے وکیل نے دلائل دیتے ہوئے کہا کہ بین الاقوامی سطح پر بچوں کے ڈیجیٹل تحفظ کے لیے قوانین بنائے جا رہے ہیں اور ریاست کی آئینی و قانونی ذمہ داری ہے کہ وہ بچوں کے بہترین مفادات کا تحفظ کرے۔ عدالت نے معاملے کی سنگینی کو مدنظر رکھتے ہوئے وزارت آئی ٹی، وزارت اطلاعات، وزارت داخلہ، وزارت قانون، پی ٹی اے (PTA) اور پیمرا (PEMRA) کو نوٹسز جاری کرتے ہوئے تفصیلی ردعمل طلب کر لیا ہے۔