دریائے سندھ میں کالاباغ، چشمہ اور تونسہ کے مقام پر نچلے درجے کا سیلاب

پی ڈی ایم اے کے مطابق پنجاب کے مختلف دریاؤں اور برسات نالوں میں مون سون بارشوں کے باعث سیلابی صورتحال برقرار ہے، تاہم گزشتہ 24 گھنٹوں سے پانی کا بہاؤ نسبتاً مستحکم اور چناب میں کمی کی جانب گامزن ہے۔ دریائے سندھ میں کالا باغ، چشمہ اور تونسہ بیراج پر جبکہ دریائے چناب میں مرالہ، خانکی، قادر آباد اور تریموں کے مقامات پر نچلے درجے کا سیلاب ریکارڈ کیا گیا ہے۔ اسی طرح دریائے راوی میں بلوکی اور سدھنائی پر نچلے درجے کی طغیانی ہے جبکہ نارووال کے نالہ بسنتر میں درمیانے اور وزیر آباد کے نالہ پھلکو میں اونچے درجے کا سیلاب موجود ہے۔ ڈی جی پی ڈی ایم اے عمر عباس میلہ نے بتایا کہ بالائی علاقوں میں بارشیں رکنے سے دریائے چناب میں طغیانی کا زور ٹوٹ رہا ہے اور انتظامیہ صورتحال پر مسلسل نظر رکھے ہوئے ہے۔