خیبرپختونخوا اسمبلی کا نیا استحقاق قانون آزادیٔ صحافت پر حملہ ہے، اختیار ولی

پاکستان مسلم لیگ (ن) خیبرپختونخوا کے صدر اختیار ولی نے صوبائی اسمبلی سے منظور کیے گئے استحقاق ترمیمی ایکٹ کو آزادیٔ صحافت اور جمہوری اقدار کے خلاف قرار دیتے ہوئے اسے فوری واپس لینے کا مطالبہ کیا ہے۔ پشاور میں پریس کانفرنس کرتے ہوئے انہوں نے الزام عائد کیا کہ اس قانون کا مقصد اختلافی آوازوں کو دبانا اور پارلیمانی رپورٹنگ پر قدغن لگانا ہے، جس کے تحت اسپیکر کی اجازت کے بغیر کوئی بھی تحریک، سوال یا قرارداد میڈیا پر نشر نہیں کی جا سکے گی۔ اختیار ولی نے صوبائی حکومت کو شدید تنقید کا نشانہ بناتے ہوئے دعویٰ کیا کہ صوبے کی 34 میں سے 18 جامعات بندش کے قریب ہیں، گومل یونیورسٹی انتظامی بحران کا شکار ہے اور ہیلتھ کارڈ سمیت ترقیاتی فنڈز میں بڑے پیمانے پر کرپشن ہو رہی ہے۔ انہوں نے پولیس کی گرتی ہوئی ساکھ، غیر قانونی کان کنی اور منشیات کے کاروبار کو سرکاری سرپرستی حاصل ہونے کا بھی الزام لگایا اور احتسابی اداروں سے ان تمام معاملات کی شفاف تحقیقات کا مطالبہ کیا۔ واضح رہے کہ خیبرپختونخوا اسمبلی سے منظورہ اس ترمیمی ایکٹ کے تحت ایوان کی کارروائی کی قبل از وقت یا مسخ شدہ رپورٹنگ پر قید اور جرمانے کی سزائیں مقرر کی گئی ہیں۔