خاتون کی جان بچاتے ہوئے جامِ شہادت نوش کرنے والے گروپ کیپٹن عاصم طارق کی نمازِ جنازہ ادا، فوجی اعزاز کے ساتھ سپردِ خاک

وفاقی دارالحکومت میں ایک خاتون کی جان بچاتے ہوئے جامِ شہادت نوش کرنے والے پاک فضائیہ کے نڈر افسر گروپ کیپٹن عاصم طارق شہید کی نمازِ جنازہ ادا کر دی گئی، جس کے بعد انہیں مکمل فوجی اعزاز کے ساتھ سپردِ خاک کر دیا گیا ہے۔

انٹر سروسز پبلک ریلیشنز (آئی ایس پی آر) کے مطابق، پاک فضائیہ کے سربراہ ایئر چیف مارشل ظہیر احمد بابر سدھو نے شہید گروپ کیپٹن عاصم طارق کی نمازِ جنازہ میں خصوصی طور پر شرکت کی۔

جنازے کے موقع پر رقت آمیز مناظر دیکھنے میں آئے۔ پاک فضائیہ کے اعلیٰ و سینئر افسران، جوانوں اور شہریوں کی ایک بہت بڑی تعداد نے نمازِ جنازہ میں شرکت کی اور وطن کے اس بہادر سپوت کو اشکبار آنکھوں کے ساتھ الوداع کہا۔ گروپ کیپٹن عاصم طارق شہید کو ان کی لازوال قربانی اور بہادری پر پاک فضائیہ کے چاق و چوبند دستے نے سلامی پیش کی اور انہیں پورے فوجی اعزاز کے ساتھ لحد میں اتارا گیا۔