بھارت میں سور کا گوشت کھانے کے بعد خاتون کے دماغ میں 38 کیڑے پیدا ہوگئے

برطانیہ کے علاقے ویلز سے تعلق رکھنے والی 42 سالہ خاتون لاؤری ڈینمین اپنی زندگی کے ایک عجیب و غریب اور انتہائی تکلیف دہ طبی دور سے گزر رہی ہیں، جس کا تاریک لنک سال 2007 میں ان کے دورۂ بھارت سے جڑا ہوا پایا گیا ہے۔

عالمی خبر رساں ادارے کے مطابق، لاؤری ڈینمین کو پہلی بار 2010 میں اس وقت ایک غیر معمولی صورتحال کا سامنا کرنا پڑا جب بیت الخلا استعمال کرنے کے بعد انہوں نے تقریباً ایک میٹر لمبا کیڑا دیکھا۔ اس وقت بنیادی طبی ٹیسٹس نارمل آنے پر انہوں نے اسے زیادہ اہمیت نہ دی، لیکن کچھ عرصے بعد مسلسل رہنے والے شدید سر درد نے ان کی زندگی اجیرن بنا دی اور اگلے ہی سال 2011 میں انہیں مرگی کا پہلا شدید دورہ پڑا، جس کے باعث وہ بے ہوش ہو گئیں اور بولنے کی صلاحیت بھی متاثر ہوئی۔

ہسپتال میں سی ٹی اسکین اور ایم آر آئی ٹیسٹ کے بعد ڈاکٹروں نے یہ ہولناک انکشاف کیا کہ خاتون کے دماغ میں 38 لاروا (Larvae) موجود ہیں۔ مزید طبی معائنے کے بعد تصدیق ہوئی کہ وہ “نیورو سسٹیسرکوسس” (Neurocysticercosis) نامی نایاب بیماری کا شکار ہیں۔ ماہرین کے مطابق یہ بیماری تب ہوتی ہے جب سور کے ٹیپ ورم کے انڈے انسانی جسم میں داخل ہو کر دماغ سمیت مختلف اعضا میں ٹھکانہ بنا لیتے ہیں۔

خاتون کا طویل عرصے تک اینٹی پیراسائٹ ادویات اور اسٹیرائیڈز کے ذریعے علاج کیا گیا، جس کے مضر اثرات (سائیڈ ایفیکٹس) کے باعث وہ شدید ڈپریشن، بے چینی اور جسمانی ساخت میں تبدیلی کا شکار بھی رہیں۔ طویل علاج کے بعد اب ان کے دماغ کے تمام لاروا مر کر ختم ہو چکے ہیں اور خوش قسمتی سے سرجری کی ضرورت نہیں پڑی، تاہم احتیاط کے طور پر انہیں زندگی بھر مرگی کی دوا کھانا ہو گی۔ ان کے معالج ڈاکٹر برینڈن ہیلی کا کہنا ہے کہ برطانیہ میں یہ بیماری انتہائی نایاب ہے اور انہوں نے اپنے پورے کیریئر میں ایسا صرف ایک کیس دیکھا ہے۔

صحت یابی کے بعد لاؤری ڈینمین نے بتایا کہ وہ 2007 میں 3 ماہ کے لیے بھارت گئی تھیں جہاں انہوں نے فوڈ پوائزننگ سے بچنے کے لیے گوشت سے پرہیز تو کیا تھا، البتہ سور کے گوشت (Pork) سے بنے کچھ کھانے کھائے تھے۔ عالمی ادارۂ صحت (WHO) کے مطابق یہ بیماری ناقص صفائی، آلودہ پانی یا سور کے ٹیپ ورم کے انڈے جسم میں جانے سے پھیلتی ہے۔ لاؤری اب اپنی اس کہانی کے ذریعے دنیا بھر میں صفائی ستھرائی اور اچھی طرح پکے ہوئے گوشت کے استعمال سے متعلق شعور بیدار کرنا چاہتی ہیں۔