کراچی میں ایک اور بچہ ایچ آئی وی کا شکار

کراچی کے گنجان آباد علاقے اورنگی ٹاؤن میں صحت عامہ کے حوالے سے تشویشناک صورتحال سامنے آئی ہے، جہاں ایک اور 3 سالہ معصوم رہائشی بچے میں مہلک وائرس ایچ آئی وی (HIV) کی تصدیق ہوئی ہے۔

میڈیکل رپورٹ کے مطابق، متاثرہ بچے کی حالت غیر ہونے پر اس کا تین مختلف کٹس کے ذریعے ایچ آئی وی ٹیسٹ کروایا گیا، اور بدقسمتی سے تینوں بار ٹیسٹ کی رپورٹ مثبت (Positive) آئی۔

متاثرہ بچے کے والدین نے میڈیا کو مروجہ صورتحال سے آگاہ کرتے ہوئے بتایا کہ کچھ عرصہ قبل ان کے بچے کا علاج ‘ولیکا اسپتال’ میں ہوا تھا، جہاں اسے مبینہ طور پر انجکشن یا ڈرپ لگائی گئی۔ والدین کا کہنا ہے کہ ہسپتال سے علاج کے بعد سے ہی بچے کی طبیعت مسلسل خراب رہنے لگی اور جب شک پڑنے پر اس کا ایچ آئی وی ٹیسٹ کروایا گیا تو وہ مثبت آیا۔ والدین نے حکام سے واقعے کی شفاف تحقیقات کا مطالبہ کیا ہے۔

واضح رہے کہ اورنگی ٹاؤن میں بچوں میں ایچ آئی وی کا پھیلاؤ ایک سنگین بحران کی شکل اختیار کرتا جا رہا ہے۔ حالیہ کیس کے بعد اس مخصوص علاقے میں اب تک ایچ آئی وی سے متاثر ہونے والے بچوں کی مجموعی تعداد ریکارڈ 107 تک پہنچ چکی ہے۔ اس کے ساتھ ہی، اورنگی ٹاؤن کے قریبی علاقے ‘ضیاء کالونی’ میں اس موذی مرض کے باعث جان کی بازی ہارنے والے معصوم بچوں کی اموات کی تعداد بھی 9 ہو گئی ہے۔ علاقہ مکینوں اور طبی ماہرین نے سندھ ہیلتھ کیئر کمیشن اور محکمہ صحت سے فوری نوٹس لینے اور عطائی ڈاکٹروں یا غیر معیاری سرنجوں کے استعمال کے خلاف سخت کریک ڈاؤن کا مطالبہ کیا ہے۔