ای سی سی نے خیبرپختونخوا کو گندم کی فراہمی کی منظوری دے دی

اسلام آباد: وزیراعظم محمد شہباز شریف کی خصوصی ہدایت پر کابینہ کی اقتصادی رابطہ کمیٹی (ECC) نے خیبر پختونخوا (KP) کو گندم کی فراہمی کی باقاعدہ منظوری دے دی ہے۔ وزیراعظم کے ان احکامات کی روشنی میں وفاقی وزارتِ نیشنل فوڈ سیکیورٹی اینڈ ریسرچ نے خیبر پختونخوا کے عوام کو گندم کی فراہمی کے تمام تر انتظامی اور لاجسٹک اقدامات کو فوری طور پر مکمل کر لیا ہے۔

وفاقی وزیر برائے نیشنل فوڈ سیکیورٹی، رانا تنویر حسین نے اس فیصلے کی تفصیلات بتاتے ہوئے درج ذیل اہم نکات کا ذکر کیا وفاقی وزیر رانا تنویر حسین کا کہنا تھا کہ خیبر پختونخوا کو گندم کی بلاتعطل فراہمی وزیراعظم شہباز شریف کی صوبائی تعصب سے بالاتر اور عوام دوست پالیسیوں کا ایک واضح اور عملی مظہر ہے۔ خیبر پختونخوا کو یہ گندم موجودہ سیزن کے آغاز ہی میں وفاق کی جانب سے مقرر کردہ باقاعدہ سرکاری قیمت پر فراہم کی جائے گی، تاکہ مارکیٹ میں گندم اور آٹے کی قیمتوں کو مستحکم رکھا جا سکے۔”وفاقی حکومت ملک کے تمام حصوں، بالخصوص خیبر پختونخوا کے عوام کو سستی گندم اور آٹے کی فراہمی یقینی بنانے کے لیے ہر ممکن اور مؤثر اقدامات جاری رکھے ہوئے ہے تاکہ عام آدمی کو ریلیف مل سکے”۔

صوبائی و معاشی مبصرین کے مطابق، اقتصادی رابطہ کمیٹی کے اس اہم فیصلے سے خیبر پختونخوا میں گندم کے اسٹاک کی کمی کا خدشہ ختم ہو جائے گا اور سیزن کے آغاز ہی میں صوبے بھر کے عوام کو مناسب اور سرکاری نرخوں پر آٹے کی دستیابی ممکن ہو سکے گی۔