اسلام آباد راولپنڈی میٹرو بس میں انجن سے اچانک آگ بھڑک اٹھی، مسافروں کی حالت خراب

اسلام آباد سے راولپنڈی آنے والی میٹرو بس کے انجن میں اچانک آگ بھڑک اٹھی جس کے باعث بس میں شدید دھواں بھر گیا اور مسافروں میں خوف و ہراس پھیل گیا۔

دھواں بھرنے کے باعث خواتین اور بچوں سمیت متعدد مسافروں کی حالت خراب ہوگئی۔

صورتحال اس وقت مزید سنگین ہوگئی جب بس کے دروازے لاک ہوگئے، جس پر مسافروں نے اپنی جان بچانے کے لیے شیشے توڑ کر بس سے باہر نکلنے کی کوشش کی۔

ریسکیو کے مطابق خوش قسمتی سے واقعے میں کسی قسم کے جانی نقصان کی اطلاع موصول نہیں ہوئی۔

بعد ازاں میٹرو بس کا عملہ موقع پر پہنچ گیا اور امدادی کارروائیاں شروع کردی گئیں۔