سینیٹ اجلاس؛ ملک میں بیروزگاری کی شرح میں اضافہ، 59 لاکھ پاکستانی روزگار سے محروم

سینیٹ کے حالیہ اجلاس کے دوران ملک میں بڑھتی ہوئی بیروزگاری کے حوالے سے تشویشناک اعداد و شمار پیش کیے گئے ہیں۔ وزارت سمندر پار پاکستانیز (اوورسیز) نے محکمہ شماریات کی رپورٹ کے حوالے سے تحریری جواب جمع کرایا ہے جس میں ملکی لیبر فورس کی موجودہ صورتحال کی عکاسی کی گئی ہے۔

 محکمہ شماریات کے مطابق مالی سال 2024-25 کے دوران پاکستان میں بیروزگار افراد کی مجموعی تعداد 59 لاکھ تک پہنچ چکی ہے۔ پاکستان لیبر فورس سروے 2024-25 کے اعداد و شمار کے مطابق ملک میں بیروزگاری کی شرح 7 فیصد سے تجاوز کر گئی ہے۔وزارت نے ایوان کو بتایا کہ حکومت نوجوانوں کو بیرونِ ملک روزگار کے مواقع فراہم کرنے اور ملکی سطح پر ہنر مندی سکھانے کے پروگرامز پر کام کر رہی ہے تاکہ اس شرح میں کمی لائی جا سکے۔سینیٹ ارکان نے ان اعداد و شمار پر گہری تشویش کا اظہار کرتے ہوئے کہا کہ بڑھتی ہوئی مہنگائی اور معاشی سست روی نے نوجوانوں کے لیے روزگار کے حصول کو مشکل بنا دیا ہے۔ ارکان نے حکومت سے مطالبہ کیا کہ صنعتی ترقی اور نجی شعبے کی حوصلہ افزائی کے لیے ہنگامی اقدامات کیے جائیں تاکہ 59 لاکھ بیروزگار افراد کو معاشی دھارے میں شامل کیا جا سکے۔