وفاقی آئینی عدالت کا سندھ حکومت کو ایڈیشنل ڈی جی ماحولیاتی ایجنسی کی تعیناتی پر نظرثانی کا حکم

وفاقی آئینی عدالت نے سندھ حکومت کی جانب سے ایڈیشنل ڈائریکٹر جنرل (ڈی جی) ماحولیاتی تحفظ ایجنسی کے عہدے پر بیوروکریٹ کی تعیناتی کے خلاف بڑا فیصلہ سناتے ہوئے حکومت کی اپیل خارج کر دی ہے۔ جسٹس روزی خان کے تحریر کردہ چھ صفحات پر مشتمل فیصلے میں عدالت نے سندھ ہائی کورٹ کے فیصلے کو برقرار رکھتے ہوئے صوبائی حکومت کو حکم دیا ہے کہ مذکورہ تعیناتی کا دوبارہ جائزہ لیا جائے اور ایڈیشنل ڈی جی کی تعلیمی قابلیت کی تصدیق ہائر ایجوکیشن کمیشن (HEC) سے کرائی جائے۔

 وفاقی آئینی عدالت نے اپنے تحریری فیصلے میں 26ویں آئینی ترمیم کا حوالہ دیتے ہوئے واضح کیا کہ آئین کے مطابق ہر شخص کو مکمل آزادی کے ساتھ زندگی گزارنے کا حق حاصل ہے، جس میں صاف اور شفاف ماحول کی فراہمی کو اب بطور بنیادی حق شامل کر لیا گیا ہے۔ عدالت نے قرار دیا کہ ماحولیاتی ایجنسی کے ڈی جی کا کردار عوام کو آلودگی سے بچانے اور ماحولیاتی قوانین کے نفاذ کے لیے انتہائی کلیدی ہے، لہٰذا اس اہم عہدے پر کسی غیر تکنیکی (نان ٹیکنیکل) شخص کی تقرری براہِ راست عوامی صحت کے لیے نقصان دہ ثابت ہو سکتی ہے۔ واضح رہے کہ سندھ حکومت نے ڈی جی ماحولیاتی ایجنسی کے عہدے پر ایک بیوروکریٹ کی تعیناتی کا نوٹیفکیشن جاری کیا تھا، جسے سندھ ہائی کورٹ نے کالعدم قرار دیتے ہوئے تقرری پر نظرثانی کا حکم دیا تھا۔ سندھ حکومت نے ہائی کورٹ کے اس فیصلے کے خلاف وفاقی آئینی عدالت میں اپیل دائر کی تھی، جسے اب عدالتِ عظمیٰ نے مسترد کرتے ہوئے شہریوں کے بنیادی حقوق کے تحفظ اور شفاف ماحول کی فراہمی کو ترجیح دی ہے۔