ڈی جی آئی ایس پی آر کی شفاء تعمیر ملت یونیورسٹی میں خصوصی نشست

ڈائریکٹر جنرل آئی ایس پی آر (DG ISPR) لیفٹیننٹ جنرل احمد شریف چوہدری نے اسلام آباد کی شفاء تعمیرِ ملت یونیورسٹی کا دورہ کیا، جہاں انہوں نے اساتذہ اور طلبا کے ساتھ ایک خصوصی معلوماتی نشست میں شرکت کی۔ یونیورسٹی آمد پر فیکلٹی ممبران اور طلبا نے ان کا پرتپاک استقبال کیا۔

اس خصوصی سیشن کے دوران ڈی جی آئی ایس پی آر نے قومی سلامتی، انسدادِ دہشت گردی اور بالخصوص انفارمیشن وارفیئر (معلوماتی جنگ) کے حوالے سے تفصیلی گفتگو کی۔ انہوں نے طلبا کے مختلف سوالات کے مدلل جوابات دیے اور انہیں ہائبرڈ وارفیئر کے خطرات سے آگاہ کیا۔

نشست کے شرکاء نے ڈی جی آئی ایس پی آر کے خیالات کو سراہتے ہوئے کہا کہ اس سیشن سے سوشل میڈیا کے ذمہ دارانہ استعمال اور جعلی خبروں (Fake News) کی روک تھام سے متعلق اہم آگاہی حاصل ہوئی ہے۔ طلبا نے دفاعِ وطن کے لیے افواجِ پاکستان کی قربانیوں کو خراجِ عقیدت پیش کیا اور مسلح افواج کے ساتھ یکجہتی کا عزم دہرایا۔

وائس چانسلر ڈاکٹر محمد اقبال خان نے اس موقع پر زور دیا کہ نوجوان نسل ملک کے استحکام کے لیے اپنا مثبت کردار ادا کرے۔ وزیرستان سمیت ملک کے مختلف علاقوں سے تعلق رکھنے والے طلبا نے اس نشست کو ایک مؤثر پیشرفت قرار دیتے ہوئے کہا کہ ایسے سیشنز سے ابہام دور کرنے اور قومی بیانیے کو سمجھنے میں مدد ملتی ہے۔