پونچھ کے کرشنا گھاٹی سیکٹر میں ایک اور کشمیری نوجوان شہید

مقبوضہ جموں و کشمیر میں بھارتی قابض افواج کے مظالم کا سلسلہ تھم نہ سکا، ضلع پونچھ کے کرشنا گھاٹی سیکٹر میں محاصرے اور تلاشی کی آڑ میں ایک اور کشمیری نوجوان کو شہید کر دیا گیا ہے۔ بھارتی فورسز نے نام نہاد سرچ آپریشن کے دوران انسانی حقوق کی سنگین پامالی کرتے ہوئے نہتے نوجوان کو نشانہ بنایا، جس سے وادی میں غم و غصے کی لہر دوڑ گئی ہے۔

حریت رہنما یاسین ملک کی اہلیہ اور انسانی حقوق کی علمبردار مشعال ملک نے بھارتی بربریت کی شدید مذمت کرتے ہوئے انکشاف کیا ہے کہ بھارتی فورسز نے شالیمار کے علاقے میں بھی متعدد نوجوانوں کو بلاجواز گرفتار کر لیا ہے، جس کے خلاف مقامی آبادی سراپا احتجاج ہے۔ مشعال ملک نے اپنے بیان میں کہا کہ بھارت بندوق کے زور پر کشمیریوں کی حقِ خودارادیت کی آواز دبانے میں کبھی کامیاب نہیں ہو سکتا۔ انہوں نے عالمی برادری پر زور دیا کہ وہ مقبوضہ کشمیر میں جاری وحشیانہ ریاستی جبر اور انسانی حقوق کی کھلی خلاف ورزیوں کا فوری نوٹس لے کر بھارت کو جوابدہ بنائے۔