گلگت بلتستان انتخابات 2026 کیلئے امیدواروں کی حتمی فہرست جاری

الیکشن کمیشن نے گلگت بلتستان اسمبلی کے آئندہ انتخابات 2026 کے لیے امیدواروں کی حتمی فہرست جاری کر دی ہے، جس کے مطابق مجموعی طور پر 403 امیدوار اپنی قسمت آزمائیں گے۔ اس بار انتخابی میدان میں آزاد امیدواروں کی بھرمار ہے جن کی تعداد 272 ہے، جبکہ مختلف سیاسی جماعتوں کے 131 امیدوار میدان میں موجود ہیں۔

خواتین کی نمائندگی کے حوالے سے فہرست میں 8 امیدوار شامل ہیں، جن میں سے 5 آزاد حیثیت میں الیکشن لڑ رہی ہیں جبکہ پاکستان پیپلز پارٹی، استحکام پاکستان پارٹی اور پی این پی نے ایک ایک خاتون امیدوار کو ٹکٹ جاری کیا ہے۔

جماعتوں کے لحاظ سے پاکستان پیپلز پارٹی پارلیمنٹرینز 23 امیدواروں کے ساتھ سرفہرست ہے، جبکہ مسلم لیگ (ن) کے 22 امیدوار مقابلے میں اتریں گے۔ استحکام پاکستان پارٹی کے 15، پاکستان مسلم لیگ کے 11، اسلامی تحریک پاکستان کے 10 اور پاکستان نظریاتی پارٹی کے بھی 10 امیدوار حصہ لے رہے ہیں۔ اس کے علاوہ جے یو آئی کے 9، مجلس وحدت المسلمین کے 7، ایم کیو ایم اور جماعت اسلامی کے 6، 6 امیدوار بھی میدان میں ہیں۔ عوامی ورکرز پارٹی کے 4 جبکہ عوامی نیشنل پارٹی، تحریک لبیک، اور سنی اتحاد کونسل سمیت دیگر جماعتوں کا ایک ایک امیدوار بھی انتخابی دوڑ میں شامل ہے۔