پاکستان ایران اور امریکا کے درمیان ثالثی کی کوششیں مزید تیز کرے: چینی وزیرِ خارجہ

چین کے وزیرِ خارجہ وانگ یی نے پاکستان پر زور دیا ہے کہ وہ ایران اور امریکہ کے درمیان کشیدگی کم کرنے اور جنگ بندی کے لیے اپنی ثالثی کی کوششوں میں مزید تیزی لائے۔ چینی سرکاری خبر ایجنسی کے مطابق، وانگ یی اور پاکستانی وزیرِ خارجہ اسحاق ڈار کے درمیان ہونے والی ٹیلیفونک گفتگو میں خطے کی سیکیورٹی صورتحال پر تفصیلی تبادلہ خیال کیا گیا۔ چینی وزیرِ خارجہ نے امید ظاہر کی کہ پاکستان آبنائے ہرمز کھولنے اور وہاں پیدا ہونے والے مسائل کے حل میں اپنا فعال کردار ادا کرے گا۔ انہوں نے خطے میں امن کی جلد بحالی کے لیے پاکستانی کوششوں پر اعتماد کا اظہار کیا۔ دوسری جانب، سعودی ولی عہد محمد بن سلمان اور اماراتی صدر شیخ محمد بن زاید النہیان کے درمیان بھی ٹیلیفونک رابطہ ہوا ہے، جس میں علاقائی سلامتی اور استحکام کے لیے مشترکہ کوششوں کو مربوط بنانے پر اتفاق کیا گیا۔