منشیات فروش ملزمہ کو پروٹوکول دینے کا معاملہ، پولیس افسران معطل

کراچی میں منشیات فروش انمول عرف پنکی کی عدالت میں پیشی کے دوران ضابطہ کار اور حفاظتی اصولوں کی خلاف ورزی کے معاملے پر آئی جی سندھ جاوید عالم اوڈھو نے سخت نوٹس لے لیا۔

واقعے کے بعد ایس ایچ او گارڈن حنیف سیال، تفتیشی افسر ظفر اقبال اور تفتیشی افسر سعید احمد کو فوری طور پر معطل کردیا گیا ہے۔

آئی جی سندھ نے ایڈیشنل آئی جی کراچی کو واقعے کی تفصیلی ابتدائی رپورٹ پیش کرنے کی ہدایت کرتے ہوئے کہا ہے کہ غفلت اور کوتاہی کے ذمہ دار اہلکاروں کے خلاف سخت کارروائی عمل میں لائی جائے۔

حکم کے مطابق معطل کیے گئے افسران کو گارڈن ہیڈکوارٹر ساؤتھ رپورٹ کرنے کی ہدایت بھی جاری کردی گئی ہے۔

واقعے کی شفاف اور غیر جانبدارانہ تحقیقات کے لیے سینئر افسران پر مشتمل تحقیقاتی کمیٹی قائم کرنے کا بھی فیصلہ کیا گیا ہے۔