پاکستان ویمنز ٹیم کا زمبابوے کیخلاف ٹی ٹوئنٹی سیریز میں شاندار فاتحانہ آغاز

کراچی میں کھیلے گئے پہلے ٹی ٹوئنٹی میچ میں پاکستان خواتین کرکٹ ٹیم نے زمبابوے ویمنز ٹیم کو 153رنز سے شکست دے کر سیریز میں ایک صفر کی برتری حاصل کرلی۔

قومی ٹیم نے پہلے بیٹنگ کرتے ہوئے 5 وکٹوں کے نقصان پر 237 رنز بنائے۔ پاکستانی بیٹر عائشہ ظفر نے شاندار بیٹنگ کا مظاہرہ کرتے ہوئے ناقابل شکست 102رنز کی اننگز کھیلی، جبکہ گل فیروزہ 37 اور عالیہ ریاض 48 رنز کے ساتھ نمایاں رہیں۔

238  رنز کے ہدف کے تعاقب میں زمبابوے خواتین ٹیم پاکستانی باؤلرز کے سامنے زیادہ دیر نہ ٹھہر سکی اور پوری ٹیم 84 رنز پر آؤٹ ہوگئی۔

پاکستان کی جانب سے فاطمہ ثناء نے عمدہ باؤلنگ کرتے ہوئے 3 کھلاڑیوں کو پویلین کی راہ دکھائی، جبکہ سعدیہ اقبال اور نتالیہ پرویز نے 2، 2وکٹیں حاصل کیں۔

قومی ٹیم نے 3 میچز پر مشتمل ٹی ٹوئنٹی سیریز میں ایک صفر کی برتری حاصل کرلی ہے۔