عوام کا اعتمادبحال کرنےکےلیے حکومت اوراپوزیشن میں بداعتمادی ختم کرناہوگی، بیرسٹر گوہر

چیئرمین پاکستان تحریک انصاف بیرسٹر گوہر نے کہا ہے کہ ہمیں امید تھی حالات بہتری کی طرف جائیں گے مگرحکومت  کا سخت رویہ حالات اور ملاقاتوں میں رکاوٹ کا سبب ہے ۔ سیاسی مسائل کو سلجھانے کی ضرورت ہے، انہیں  پیچیدہ نہ کریں۔

راولپنڈی کے اڈیالہ روڈ پر میڈیا سے گفتگو میں بیرسٹر گوہر نے کہا کہ  عمران خان اور اُن کی اہلیہ بشریٰ بی بی کی بگڑتی صحت پر فیملی کو ملاقات نہ کرنے دینا سخت گیر رویہ ہے۔ ان کی فیملی اور ذاتی معالجین کو رسائی دی جائے۔

بیرسٹر گوہر نے مزید کہا کہ وزیراعظم کی جانب سے شاید محمود اچکزئی سے رابطہ کیا گیا ہے،  مذاکرات ضرور ہونے چاہئیں، مذاکرات کا مینڈیٹ اچکزئی صاحب کے پاس ہے۔ حکومت آنے والی ترامیم پر عوام کے سامنے اپنا موقف واضح کرے، ایک تشویش یہ بھی ہے 18ویں ترمیم کو رول بیک کیا جا رہا ہے۔

چیئرمین پی ٹی آئی نے کہا کہ وزیر قانون نے اقلیتی کمیشن کے بارے میں رابط کیا ہے، الیکشن کمشنر اور الیکشن کمیشن کے ممبران کی تقرری کے لیے بھی ملاقات ہونی ہے۔

اُن کا کہنا تھا کہ اب عملی اقدامات کی ضرورت ہے، فریقین میں عدم اعتماد بڑھ رہا ہے، عوام کا اعتماد بحال کرنے کے لیے فریقین کے درمیان بداعتمادی ختم کرنا ہوگی۔