ایران وزیرخارجہ اور قطری وزیراعظم کا رابطہ، آبنائے ہرمزکی بحالی پر گفتگو

ایران کے وزیرِخارجہ عباس عراقچی نے قطر کے وزیرِاعظم شیخ محمد بن عبدالرحمان آل ثانی سے ٹیلیفون پر رابطہ کیا جس میں دونوں رہنماؤں نے خطے کی تازہ صورتحال اور جاری سفارتی کوششوں پر تفصیلی تبادلہ خیال کیا۔

عرب میڈیا کے مطابق ایرانی وزیرِخارجہ نے قطری وزیراعظم کو امریکا کے ساتھ جاری مذاکرات کی موجودہ پیش رفت سے آگاہ کیا اور بتایا کہ دونوں ممالک کے درمیان جنگ کے مستقل خاتمے کے لیے کوششیں جاری ہیں۔

قطری وزیرِاعظم  نے جنگ کے فوری خاتمے کے لیے جاری سفارتی اور ثالثی کوششوں کی مکمل حمایت کا اعادہ کرتے ہوئے کہا کہ قطر خطے میں امن و استحکام کے لیے اپنا کردار ادا کرتا رہے گا۔

انہوں نے خاص طور پر آبنائے ہرمز میں جہاز رانی کی آزادی کی اہمیت پر زور دیتے ہوئے کہا کہ عالمی تجارت کے لیے اس اہم گزرگاہ کو جلد از جلد مکمل طور پر بحال کیا جانا چاہیے۔