جرمنی کا ایران سے آبنائے ہرمز کی ناکہ بندی ختم کرنے کا مطالبہ

جرمنی کے وزیر خارجہ جان ویڈ فال نے ایران پر زور دیا ہے کہ وہ فوری طور پر آبنائے ہرمز کی ناکہ بندی ختم کرے، کیونکہ اس بحران کی وجہ سے تیل کی قیمتوں میں اضافہ عالمی معیشت کے لیے سنگین خطرہ بن چکا ہے۔ سوشل میڈیا پر جاری اپنے بیان میں انہوں نے کہا کہ اس اہم آبی گزرگاہ میں کشیدگی کے باعث ہزاروں تجارتی جہاز اور تقریباً 20 ہزار ملاح پھنسے ہوئے ہیں، جس پر اقوام متحدہ کی سلامتی کونسل کو فوری طور پر ایک قرارداد منظور کرنی چاہیے۔ جرمن وزیر خارجہ نے سلامتی کونسل میں جرمنی کی مستقل نشست کے حصول کی خواہش کا اعادہ کرتے ہوئے کہا کہ اس ادارے کو عالمی امن کے لیے اپنی ذمہ داری پوری کرنی چاہیے۔ واضح رہے کہ 15 رکنی سلامتی کونسل میں 5 مستقل اراکین کے پاس ویٹو پاور ہے، جبکہ باقی 10 نشستیں علاقائی نمائندگی کی بنیاد پر تبدیل ہوتی رہتی ہیں۔