دہلی ائیرپورٹ پر سوئس ائیر کے طیارے کے انجن میں آگ، 6 مسافر زخمی

دہلی ائیرپورٹ پر سوئس ائیر کے ایک طیارے کے انجن میں پرواز سے قبل آگ لگ گئی، جس کے بعد ہنگامی کارروائی کرتے ہوئے طیارے کو فوری طور پر روک لیا گیا۔ واقعے میں 6 مسافر زخمی ہوگئے جنہیں طبی امداد کے لیے اسپتال منتقل کردیا گیا۔

سوئس ائیر کی جانب سے جاری بیان کے مطابق پرواز ایل ایکس 147 بھارتی وقت کے مطابق رات ایک بج کر آٹھ منٹ پر دہلی سے زیورخ روانہ ہونے والی تھی کہ روانگی کے فوری بعد ایک انجن میں خرابی پیدا ہوئی اور آگ بھڑک اٹھی۔

بیان میں کہا گیا کہ عملے نے فوری طور پر صورتحال کا جائزہ لیا اور احتیاطی تدابیر کے تحت طیارے کو واپس اتار کر مسافروں کا محفوظ انخلا کیا۔

کمپنی کے مطابق پرواز میں 228 مسافر اور 4 بچے سوار تھے، جبکہ تمام عملہ محفوظ رہا۔

سوئس ائیر نے بتایا کہ بعض افراد ایمرجنسی سلائیڈ استعمال نہ کرسکے، جنہیں بعد ازاں سیڑھیوں کے ذریعے باہر نکالا گیا۔

کمپنی کا کہنا ہے کہ تمام مسافروں کے قیام اور متبادل پرواز کے انتظامات کردیئے گئے ہیں، جبکہ واقعے کی وجوہات جاننے کے لیے تحقیقات جاری ہیں۔