پاکستان میں مذاکرات کے نئے دور میں پیشرفت کی امید ہے: ترک وزیر خارجہ

ترکیہ کے وزیر خارجہ حاکان فیدان نے انکشاف کیا ہے کہ ایران اور امریکہ کے درمیان جوہری مذاکرات کا نیا اور اہم دور پاکستان میں شروع ہونے جا رہا ہے، جس میں بڑی پیش رفت کی قوی امید ہے۔ ان کا کہنا تھا کہ ترکیہ ان مذاکرات کی بھرپور حوصلہ افزائی کر رہا ہے اور جلد ہی دونوں ممالک کے درمیان موجود اہم رکاوٹیں دور ہو سکتی ہیں۔

حاکان فیدان کے مطابق جوہری معاملے پر ایک یا دو بنیادی نکات حل ہونے کے قریب ہیں، تاہم انہوں نے واضح کیا کہ محض جنگ بندی میں توسیع مثبت قدم تو ہے لیکن حتمی معاہدے کے لیے کافی نہیں۔ انہوں نے خطے کی صورتحال پر گفتگو کرتے ہوئے کہا کہ آبنائے ہرمز کی صورتحال بھی ان مذاکرات کی کامیابی سے جڑی ہوئی ہے؛ اگر معاہدہ طے پا جاتا ہے تو وہاں بحری آمدورفت مکمل طور پر بحال ہو جائے گی۔

ترک وزیر خارجہ نے مزید کہا کہ سمندری حدود سے بارودی سرنگوں کی صفائی کے لیے بین الاقوامی تعاون حاصل کیا جا سکتا ہے۔ انہوں نے ترکیہ کی خارجہ پالیسی پر روشنی ڈالتے ہوئے دوٹوک الفاظ میں کہا کہ کسی بھی نئی جنگی صورتحال کی صورت میں ترکیہ غیر جانبدار رہے گا، تاہم وہ تمام متعلقہ فریقین کے ساتھ مسلسل رابطے میں ہے تاکہ خطے میں استحکام کو یقینی بنایا جا سکے۔