آبنائے ہرمزکے قریب 3بحری جہازوں پر فائرنگ، 2جہازایرانی تحویل میں

خلیج میں ایک بارپھر کشیدگی بڑھنے لگی۔ آبنائے ہرمزکے قریب بحری قوانین کی خلاف ورزی پر تین جہازوں پر فائرنگ کی گئی جبکہ ایرانی پاسداران انقلاب نے دو جہازوں کو قبضے میں لے لیا۔

ایرانی میڈیا کے مطابق ایک بحری جہاز ایم ایس سی فرانسسکا اسرائیل کی ملکیت ہے جبکہ دوسرے جہاز پر پاناما کا جھنڈا لہرا رہا ہے۔ دونوں جہازوں کو سمندر سے ایرانی ساحل پر منتقل کردیاگیا۔

برطانوی میری ٹائم سیکیورٹی ایجنسی کے مطابق آبنائے ہرمز پر تین جہازوں پر فائرنگ ہوئی تاہم بحری جہاز اور عملے کے ارکان محفوظ رہے۔میری ٹائم ذرائع کے مطابق ایک جہاز نے اطلاع دی کہ اس پر ایران کے ساحل سے تقریباً 8 ناٹیکل میل مغرب میں فائرنگ کی گئی، تاہم خوش قسمتی سے تمام عملہ محفوظ رہا اور کسی جانی نقصان کی اطلاع نہیں ملی۔

اس سے چند گھنٹے قبل ایک اور کارگو جہاز پر عمان کے قریب 15 ناٹیکل میل  شمال مشرق میں فائرنگ کی گئی، جس کے نتیجے میں جہاز کے برج کو شدید نقصان پہنچا۔

ذرائع کے مطابق متاثرہ جہاز ایم ایس سی فرانسسکا، دمام سے سنگاپور جا رہا تھا۔ایران کی سرکاری خبر ایجنسی تسنیم کے مطابق یہ کارروائی سمندری قوانین کے نفاذ کے تحت کی گئی کیونکہ متعلقہ جہازوں  نے جاری کردہ وارننگز کو نظر انداز کیا تھا۔