آبنائے ہرمز میں پھنسے ہزاروں ملاحوں کے لیے اقوام متحدہ کی مدد کی اپیل

اقوام متحدہ کی میری ٹائم ایجنسی انٹرنیشنل میری ٹائم آرگنائزیشن نے آبنائے ہرمز میں پھنسے ہزاروں ملاحوں کی مدد کے لیے فوری اقدامات کی اپیل کی ہے۔

ایجنسی کے مطابق آبنائے ہرمز میں اس وقت تقریباً دو ہزار بحری جہاز موجود ہیں جن پر بیس ہزار سے زائد ملاح سوار ہیں، جو کھلے سمندر میں غیر یقینی صورتحال کا سامنا کر رہے ہیں۔

رپورٹ میں بتایا گیا ہے کہ ملاح شدید ذہنی دباؤ اور تھکاوٹ کا شکار ہیں، جس کے باعث ان کی فلاح و بہبود کے لیے ہنگامی اقدامات کی ضرورت ہے۔

کچھ شپنگ کمپنیوں کی جانب سے ملاحوں کے لیے چوبیس گھنٹے ہیلپ لائن قائم کی گئی ہے، جبکہ بعض کمپنیاں خوراک اور ضروری اشیا کی فراہمی کے لیے بھی کوششیں کر رہی ہیں۔

تاہم ایجنسی نے خبردار کیا ہے کہ موجودہ اقدامات ناکافی ہیں اور کمپنیوں کو چاہیے کہ ملاحوں کی ذہنی صحت کے لیے دور دراز معاونت سمیت مزید سہولیات فراہم کریں۔