اسپین کا بڑا فیصلہ، تقریباً 5 لاکھ غیر قانونی تارکین وطن کو قانونی حیثیت دینے کی منظوری

اسپین کی حکومت نے تقریباً پانچ لاکھ غیر قانونی تارکین وطن کو قانونی حیثیت دینے کے منصوبے کی منظوری دے دی ہے، جسے ملک میں ایک اہم اور بڑا فیصلہ قرار دیا جا رہا ہے۔

وزیر اعظم پیدرو سانچیز نے ہسپانوی عوام کے نام اپنے پیغام میں اس اقدام کو انصاف اور ملکی ضرورت قرار دیتے ہوئے کہا کہ یہ فیصلہ ان افراد کی حقیقت کو تسلیم کرنے کے لیے کیا گیا ہے جو پہلے ہی اسپین کے معاشرے کا حصہ بن چکے ہیں۔ ان کا کہنا تھا کہ یہ تارکین وطن ملک کی معیشت اور عوامی خدمات کو سہارا دینے میں اہم کردار ادا کر رہے ہیں، خاص طور پر ایسے وقت میں جب اسپین کی آبادی تیزی سے عمر رسیدہ ہو رہی ہے۔

حکومتی منصوبے کے تحت ان افراد کو ایک سال کے لیے رہائشی اجازت نامہ دیا جائے گا، جس میں توسیع بھی ممکن ہو گی۔ اس کے بعد وہ ملک کے کسی بھی حصے میں اور کسی بھی شعبے میں کام کر سکیں گے۔

تاہم اس سہولت کے حصول کے لیے ضروری ہوگا کہ درخواست دہندہ یہ ثابت کرے کہ وہ کم از کم پانچ ماہ سے اسپین میں مقیم ہے اور اس کا مجرمانہ ریکارڈ صاف ہے۔ درخواستیں سولہ اپریل سے جون کے آخر تک جمع کروائی جا سکیں گی۔

دوسری جانب اپوزیشن جماعت نے اس فیصلے کی مخالفت کرتے ہوئے خدشہ ظاہر کیا ہے کہ اس اقدام سے مزید غیر قانونی ہجرت کو فروغ مل سکتا ہے۔

یہ فیصلہ ایسے وقت میں سامنے آیا ہے جب یورپ کے کئی ممالک امیگریشن قوانین کو مزید سخت بنا رہے ہیں۔