لبنان جنگ بندی معاہدے کا لازمی حصہ ہے، پیچھے ہٹنے کی گنجائش نہیں: ایرانی اسپیکر

ایران نے امریکا پر واضح کردیا ہے کہ لبنان جنگ بندی معاہدے کا حصہ ہے اور وہ کسی صورت معاہدے سے الگ نہیں ہوگا۔ ایرانی پارلیمنٹ کے اسپیکر باقر قالیباف نے نام لیے بغیر امریکا کو خبردار کیاکہ وقت تیزی سے ختم ہورہا ہے، ایران کے اتحادی لبنان سمیت تمام مزاحمتی محاذ جنگ بندی کا کبھی علیحدہ نہ ہونے والا حصہ ہیں اور یہی دس نکاتی تجویز کا پہلا نکتہ ہے۔ باقر قالیباف نے کہا کہ پاکستان کے وزیراعظم شہبازشریف لبنان کے مسئلہ پر عوامی سطح پر اور واضح طور پر زور دے چکے ہیں، اس معاملے سے انکار یا پیچھے ہٹنےکی کوئی گنجائش ہی نہیں۔ باقر قالیباف کا کہنا تھا کہ جنگ بندی کی خلاف ورزیوں کی بھاری قیمت ہوگی اور سخت ردعمل آئے گا، بہتر ہے کہ اس آگ کو فوری طور بجھایا جائے۔