حکومتی کاوشوں سے ملک دیوالیہ ہونے سے بچ گیا، پاکستان کی معیشت مستحکم ہو چکی: وزیراعظم

وفاقی دارالحکومت میں ملک کے نامور ایکسپورٹرز اور کاروباری شخصیات کے اعزاز میں تقریب سے خطاب کرتے ہوئے وزیراعظم شہباز شریف نے کہا کہ حکومت کی کامیاب پالیسیوں کی بدولت پاکستان ڈیفالٹ کے دہانے سے بچ گیا اور معیشت مستحکم ہو چکی ہے۔

وزیراعظم نے ایکسپورٹرز کی تعریف کرتے ہوئے کہا کہ مشکل حالات میں انہوں نے اپنی محنت سے ایکسپورٹس میں اضافہ کیا اور اربوں ڈالرز کمائے۔ انہوں نے بتایا کہ عالمی مالیاتی اداروں اور دوست ممالک کی مدد نے بھی ملکی فارن ایکسچینج کو مستحکم کرنے میں کردار ادا کیا، جس میں چین، سعودی عرب، یو اے ای اور قطر کا تعاون قابل ذکر ہے۔

شہباز شریف نے کہا کہ معیشت میں استحکام آ چکا ہے، مہنگائی سنگل ڈیجٹ میں ہے اور پالیسی ریٹ ساڑھے 10 فیصد پر پہنچ گیا ہے، تاہم معاشی ترقی کے لیے مزید اقدامات کی ضرورت ہے۔

وزیراعظم نے پرائیویٹ سیکٹر کے کردار کو اجاگر کرتے ہوئے کہا کہ کاروبار کرنا حکومت کا کام نہیں بلکہ پرائیویٹ سیکٹر کی ذمہ داری ہے اور ایکسپورٹس کے ذریعے ڈالرز کمانا ملکی مشکلات کا حل ہے۔ انہوں نے کہا کہ تاجروں، صنعتکاروں اور ایکسپورٹرز کی تجاویز کا خیر مقدم کیا جائے گا اور ان کے تعاون سے ملک کی معاشی ترقی ممکن ہوگی۔

شہباز شریف نے پی آئی اے کی شفاف نجکاری اور دنیا بھر میں پاکستانی پاسپورٹ کی اہمیت کو اجاگر کرتے ہوئے بتایا کہ حکومت کاروباری طبقے اور ایکسپورٹرز کو ہر ممکن تعاون فراہم کر رہی ہے۔