بجلی صارفین کیلئے فی یونٹ 48 پیسے مہنگی ہونے کا امکان، نیپرا آج سماعت کرے گا

نیپرا آج سی پی پی اے کی ماہانہ فیول پرائس ایڈجسٹمنٹ (FPA) کی درخواست پر سماعت کرے گا، جس میں بجلی صارفین کے لیے فی یونٹ 48 پیسے اضافے کی سفارش کی گئی ہے۔

سی پی پی اے کے مطابق دسمبر میں ملک بھر میں 8 ارب 48 کروڑ 70 لاکھ یونٹس بجلی پیدا کی گئی جبکہ ڈسکوز کو 8 ارب 20 کروڑ 80 لاکھ یونٹس فراہم کی گئی۔ ماہ دسمبر میں بجلی کی فی یونٹ لاگت 9.62 روپے رہی۔

درخواست کے مطابق بجلی کی پیداوار میں مختلف ذرائع کا حصہ اس طرح رہا: ہائیڈل 18.07 فیصد، مقامی کوئلہ 13.99 فیصد، درآمدی کوئلہ 10.13 فیصد، قدرتی گیس 11.20 فیصد، درآمدی گیس 17.24 فیصد اور نیوکلیئر سے 25.05 فیصد پیداوار ہوئی۔

نیپرا کی آج ہونے والی سماعت کے بعد بجلی کی نئی قیمتوں کا اعلان متوقع ہے، جس کے بعد صارفین پر اضافی بوجھ پڑ سکتا ہے۔