خیبر پختونخوا میں تیل اور گیس کے نئے ذخائر دریافت

آئل اینڈ گیس ڈیولپمنٹ کمپنی لمیٹڈ (او جی ڈی سی ایل) نے خیبر پختونخوا میں تیل و گیس کے نئے ذخائر دریافت ہونے کا اعلان کر دیا ہے۔ او جی ڈی سی ایل نے اس اہم پیش رفت سے متعلق پاکستان سٹاک ایکسچینج (پی ایس ایکس) انتظامیہ کو باضابطہ طور پر خط کے ذریعے آگاہ کر دیا ہے۔

خط کے متن کے مطابق ضلع کوہاٹ میں بارگزئی فیلڈ کے ایکس ون کنوئیں سے یومیہ 3 ہزار 100 بیرل تیل کے ذخائر دریافت ہوئے ہیں، جبکہ ناشپا بلاک کے کنوئیں سے یومیہ 8 اعشاریہ 15 ملین مکعب فٹ گیس کے نئے ذخائر حاصل ہوئے ہیں۔

او جی ڈی سی ایل کے مطابق دریافت شدہ ذخائر کا ویل ہیڈ فلوئنگ پریشر 3 ہزار 10 پاؤنڈ فی مربع انچ ریکارڈ کیا گیا ہے۔ بارگزئی ایکس ون کنوئیں کی کھدائی 30 دسمبر 2024 کو 5 ہزار 170 میٹر کی گہرائی تک مکمل کی گئی تھی۔

اعلامیے میں بتایا گیا کہ ناشپا فیلڈ میں کھدائی کا عمل جدید اور کامیاب ڈرل سسٹم کے ذریعے مکمل کیا گیا، جسے ملکی توانائی ضروریات کیلئے اہم پیش رفت قرار دیا جا رہا ہے۔