اپنی فوج کو کسی بھی وقت دنیا کے کسی بھی ملک پر حملے کا حکم دے سکتا ہوں؛ ٹرمپ

عالمی خبر رساں ادارے کے مطابق امریکی صدر ڈونلڈ ٹرمپ نے ایک انٹرویو میں کہا ہے کہ وہ دنیا کے کسی بھی ملک پر فوجی حملے کا حکم دے سکتے ہیں اور انہیں ایسا کرنے کا مکمل اختیار حاصل ہے کیونکہ وہ امریکا کے کمانڈر انچیف ہیں۔ صدر ٹرمپ کا کہنا تھا کہ اس فیصلے میں انہیں کوئی نہیں روک سکتا اور وہ کسی ملک پر حملے کا فیصلہ صرف اپنی سوچ اور طے کردہ اخلاقی اصولوں کے تحت کرتے ہیں، کسی اور کی پروا نہیں۔

صدر ٹرمپ کا یہ بیان ایسے وقت میں سامنے آیا ہے جب امریکی سینیٹ نے ایک قرارداد بحث کے لیے منظور کی، جس کے تحت صدر کو وینزویلا میں مزید فوجی اقدامات کے لیے کانگریس کی اجازت لینا ہوگی۔ قرارداد کے حق میں 52 جبکہ مخالفت میں 47 ووٹ پڑے۔ اس پر صدر ٹرمپ نے اپنی ہی جماعت ریپبلکن کے اُن سینیٹرز پر شدید تنقید کی جنہوں نے قرارداد کی حمایت کی اور انہیں سیاسی نتائج کی دھمکی بھی دی۔

بعد ازاں صدر ٹرمپ نے وینزویلا کے خلاف دوسرے مرحلے میں کیے جانے والے فوجی حملے کو منسوخ کرنے کا اعلان کیا۔ یاد رہے کہ 3 جنوری کو امریکی فورسز نے وینزویلا پر کارروائی کرتے ہوئے صدارتی محل میں آپریشن کیا تھا، جس کے دوران صدر نکولس مادورو اور ان کی اہلیہ کو گرفتار کر کے امریکا منتقل کیا گیا۔ اس آپریشن میں 100 افراد ہلاک ہوئے، جن میں وینزویلا اور کیوبا کے 55 فوجی اہلکار شامل تھے۔

صدر مادورو اور ان کی اہلیہ کو نیویارک کی عدالت میں پیش کیا گیا، جہاں ان پر سنگین الزامات عائد کیے گئے، تاہم انہوں نے تمام الزامات کو مسترد کرتے ہوئے گرفتاری کو اغوا قرار دیا۔ اس واقعے کے بعد عالمی سطح پر یہ بحث شدت اختیار کر گئی کہ امریکا نے کس قانونی جواز کے تحت وینزویلا پر حملہ کیا اور وہاں کے صدر کو حراست میں لیا۔