کراچی میں 9روزسےپانی کا بحران برقرار،متعدد علاقوں میں فراہمی معطل، ہائیڈرنٹس پر سپلائی جاری

کراچی میں 9روز گزرنے کے باوجود پانی کا بحران حل نہیں کیاجاسکا۔ مختلف علاقوں میں 9 دن سے پانی کی فراہمی بند ہے۔شہرکےبیشتر علاقوں میں 25 اپریل سے پانی کی فراہمی بند ہے جبکہ 27 اپریل کو دھابیجی پمپنگ اسٹیشن پر بجلی کے بریک ڈاؤن نے پانی کا نظام مکمل طورپر درہم برہم کردیا۔

بریک ڈاؤن کی وجہ سے 3 مرکزی لائنیں پھٹ گئی تھیں جس میں سے دو لائنوں کا مرمتی کام مکمل کرلیا گیا لیکن لائن نمبر 2 کا کام اب تک مکمل نہیں ہوسکا جس کی وجہ سے  کراچی کے متعدد علاقوں میں پانی کی فراہمی بند ہے۔ ان میں  کورنگی، لانڈھی، ملیر، شاہ فیصل کالونی، گلستان جوہر، گلشن اقبال، لیاقت آباد، پی آئی بی کالونی  اولڈ سٹی ایریا، محممود آباد، منظور کالونی، کورنگی کراسنگ، ڈیفنس کلفٹن سمیت متعدد علاقے شامل ہیں۔

کراچی شہر کا بڑا حصہ پانی سے محروم ہے  شہری پانی کی بوند بوند کو ترس رہے ہیں مہنگے داموں پانی خرید کر اپنی ضروریات پوری کرر ہے ہیں۔

شہر میں  لائنوں کے ذریعے پانی کی فراہمی بند ہے جبکہ سرکا ری ہائیڈرنٹس پر ایک دن بھی پانی بند نہیں ہوا جس کی وجہ سے شہریوں میں غم وغصہ پایا جا تا ہے جبکہ ترجمان واٹر کارپوریشن  نے دعوی کیا ہے کہ شہر  کو یومیہ 650 ملین گیلن کے مقابلے میں 610 ملین گیلن پانی فراہم کیا جا رہا ہے صرف 40 ملین گیلن پانی فراہم نہیں کیا جا رہا۔