امریکہ کے قیام کی 250ویں سالگرہ، صدر ٹرمپ کی عوام کو یوم آزادی کی مبارکباد

ریاست ہائے متحدہ امریکہ میں آج آزادی کی 250ویں تاریخی سالگرہ روایتی جوش و خروش سے منائی جا رہی ہے، جس پر صدر ڈونلڈ ٹرمپ نے امریکی عوام کو دل کی گہرائیوں سے مبارکباد پیش کی ہے۔

یومِ آزادی کے اس تاریخی موقع پر امریکی صدر ڈونلڈ ٹرمپ نے 4 سابق امریکی صدور کے ساتھ اپنی تصویر کا ایک خصوصی ماڈل شیئر کیا اور اپنی تصویر پر مشتمل ایک منفرد یادگاری ڈیزائن بھی متعارف کروایا۔ اس تاریخی سنگِ میل کی مناسبت سے نیویارک سمیت امریکہ کے مختلف شہروں میں شاندار آتشبازی کا مظاہرہ کیا گیا۔

امریکہ کے 250ویں یومِ آزادی پر وزیراعظم پاکستان محمد شہباز شریف نے اپنے ایک تہنیتی پیغام میں امریکی قیادت اور عوام کو مبارکباد پیش کی۔ انہوں نے کہا کہ پاکستان پائیدار جمہوری اقدار اور اس تاریخی خوشی کے موقع پر امریکہ کے ساتھ کھڑا ہے، اور عالمی امن کو درپیش چیلنجز سے نمٹنے کے لیے دونوں ممالک یکجا ہیں۔

واضح رہے کہ 4 جولائی 1776ء کو امریکہ نے برطانیہ سے اپنی آزادی کا باضابطہ اعلان کیا تھا، جس کے بعد سے ہر سال 4 جولائی کو امریکہ میں یومِ آزادی منایا جاتا ہے اور اس خاص دن پر ملک بھر میں عام تعطیل ہوتی ہے۔ اس دن کی مناسبت سے امریکہ میں سرکاری سطح پر وسیع پیمانے پر جشن کا اہتمام کیا جاتا ہے۔ ہمیشہ کی طرح اس بار بھی پاکستانی عوام، سول اور عسکری قیادت نے امریکی عوام اور قیادت کے لیے نیک تمناؤں کا اظہار کیا ہے۔