حکومت نے کبھی پی ٹی آئی سے رابطہ نہیں کیا، علیمہ خان کے دعوے غلط ہیں: طلال چودھری

پاکستان مسلم لیگ (ن) کے سینیئر رہنما اور سینیٹر طلال چودھری نے کہا ہے کہ علیمہ خان اپنے بھائی کی صحت، مقدمات اور سیاست کو ایک ساتھ ملا دیتی ہیں، اور عوام خود بخوبی سمجھتے ہیں کہ اس سب کا اصل مقصد کیا ہے۔

سماجی رابطے کی ویب سائٹ ایکس (سابقہ ٹوئٹر) پر جاری اپنے ایک بیان میں طلال چوہدری نے واضح کیا کہ وزیرِ داخلہ کی جانب سے پی ٹی آئی کو کسی بھی قسم کی پیشکش کیے جانے کا دعویٰ سراسر غلط اور بے بنیاد ہے۔ انہوں نے کہا کہ حقیقت یہ ہے کہ حکومت نے کبھی بھی پاکستان تحریک انصاف سے کوئی رابطہ نہیں کیا، بلکہ رابطے ہمیشہ خود پی ٹی آئی کی جانب سے ہی کیے گئے۔

سینیٹر طلال چودھری نے حکومتی پوزیشن واضح کرتے ہوئے کہا کہ حکومت کا مؤقف ہر بار ایک ہی رہا ہے کہ جیل میں بانی پی ٹی آئی سے ملاقاتیں صرف اور صرف قانون اور جیل کے قواعد و ضوابط کے مطابق ہی ہوں گی۔ انہوں نے علیمہ خان کے رویے پر سوال اٹھاتے ہوئے کہا کہ علیمہ خان خود کیوں نہیں چاہتیں کہ بانی پی ٹی آئی سے ان کی دوسری بہنیں اور دیگر اہلَ خانہ بھی ملاقات کر سکیں، آخر اس کے پیچھے کیا وجہ ہے۔