سوات میں گاڑی گہری کھائی میں جا گری، 11 افراد جاں بحق، 5 زخمی

سوات میں مالم جبہ کے قریب ایک مسافر گاڑی گہری کھائی میں گر گئی، جس کے نتیجے میں 11 افراد جاں بحق اور 5 زخمی ہو گئے۔ ریسکیو حکام کے مطابق حادثہ اس وقت پیش آیا جب گاڑی سیر تلیگرام سے گناجیر جا رہی تھی کہ موڑ کاٹتے ہوئے بے قابو ہو کر گہری کھائی میں جا گری۔

حادثے کی اطلاع ملتے ہی مقامی افراد اور ریسکیو کی امدادی ٹیمیں موقع پر پہنچ گئیں اور لاشوں و زخمیوں کو کھائی سے نکالنے کا کام شروع کیا۔ حکام نے تصدیق کی ہے کہ جاں بحق ہونے والوں میں خواتین اور بچے بھی شامل ہیں، جن کی لاشیں اور تمام زخمیوں کو فوری طور پر سیدو شریف ہسپتال منتقل کر دیا گیا ہے۔ ہسپتال ذرائع کے مطابق بعض زخمیوں کی حالت تشویشناک ہے جس کے باعث ہلاکتوں میں اضافے کا خدشہ ہے۔