’آج کل ترامیم کرنا کون سا مشکل ہے‘ 14 سال سزا کاٹ کر رہا ہونے پر اپیل خارج

سپریم کورٹ آف پاکستان نے ملزم تحرین الیاس کی عمر قید کو سزائے موت میں تبدیل کرنے سے متعلق اپیل خارج کر دی ہے کیونکہ ملزم 14 سال قید کاٹنے کے بعد رہا ہو چکا ہے۔ سماعت کے دوران جیل سپرنٹنڈنٹ ژوب (بلوچستان) نے ویڈیو لنک پر بتایا کہ ملزم کی باقی ماندہ سزا صدر مملکت کی عام معافی کے تحت ختم کی گئی۔ اس پر عدالت نے ریمارکس دیے کہ سپریم کورٹ کے فیصلوں کے مطابق عمر قید کے لیے 17 سال کی سزا لازم ہے، تاہم ملزم کی رہائی کے باعث اس قانونی نکتے کا جائزہ کسی دوسرے مقدمے میں لیا جائے گا۔ عدالت نے واضح کیا کہ آئین کے تحت صدر کو معافی کا اختیار حاصل ہے، اگر سزا بڑھانے کی گنجائش پیدا کرنی ہے تو آئینی ترمیم کرائی جائے، “ویسے بھی آج کل ترامیم کرنا کون سا مشکل ہے”۔ دورانِ سماعت عدالت نے وکیل سے جملہ بازی کرتے ہوئے یہ بھی کہا کہ “اگر ہم وکلاء کی تلاشی لیں تو 70 فیصد وکلاء سے اسلحہ نکل آئے گا”۔