سندھ حکومت کا مزید ڈبل ڈیکر اور الیکٹرک بسیں چلانے کا اعلان

سندھ حکومت نے صوبے بھر بالخصوص کراچی کے عوام کو سفر کی بہترین اور جدید سہولیات فراہم کرنے کے لیے مزید ڈبل ڈیکر اور سینکڑوں نئی الیکٹرک بسیں (EV Buses) سڑکوں پر لانے کا بڑا اعلان کر دیا ہے۔ صوبائی درالحکومت میں میڈیا سے گفتگو کرتے ہوئے سینئر صوبائی وزیر شرجیل انعام میمن نے بتایا کہ عوامی سفری مشکلات کے خاتمے کے لیے سندھ حکومت مزید ڈبل ڈیکر بسوں کے ساتھ ساتھ 500 نئی الیکٹرک بسیں درآمد کر رہی ہے۔ انہوں نے فخر کا اظہار کرتے ہوئے کہا کہ پورے پاکستان میں سب سے پہلے ای وی (الیکٹرک) بسوں کا کامیاب آغاز سندھ حکومت نے ہی کیا تھا، اور ان نئی بسوں کی آمد سے عوام کا سفری معیار مزید بلند ہو جائے گا۔

شرجیل انعام میمن کا مزید کہنا تھا کہ اس وقت بھی سینکڑوں جدید بسیں سندھ کے مختلف شہروں کی سڑکوں پر کامیابی سے چل رہی ہیں جس سے لاکھوں مسافر روزانہ مستفید ہو رہے ہیں۔ انہوں نے صوبائی انفراسٹرکچر کی تعریف کرتے ہوئے کہا کہ اگر کوئی بھی غیر جانبدار ہو کر صوبائی حکومت کی بنائی ہوئی سڑکیں دیکھے تو وہ معیار میں بہت اچھی اور بین الاقوامی معیار کے مطابق ہیں، جن پر ان جدید بسوں کو چلانے میں کوئی دشواری پیش نہیں آ رہی۔ حکومت کا عزم ہے کہ ٹرانسپورٹ کے اس نیٹ ورک کو جلد ہی صوبے کے دیگر اضلاع تک بھی وسعت دی جائے گی