شکارپور میں باراتیوں کی بس کھائی میں جا گری، 4 افراد جاں بحق، متعدد زخمی

شکارپور: سندھ کے علاقے شکارپور میں باراتیوں سے بھری ایک بس کھائی میں گرنے کے نتیجے میں کم از کم 4 افراد جاں بحق جبکہ متعدد زخمی ہوگئے۔ ابتدائی اطلاعات کے مطابق حادثہ بس کا ٹائر پھٹنے کے باعث پیش آیا۔
ترجمان ریسکیو 1122 کے مطابق حادثے کی اطلاع ملتے ہی سینٹرل کمانڈ اینڈ کنٹرول کی ہدایت پر اربن سرچ اینڈ ریسکیو ٹیم، ڈیزاسٹر رسپانس گاڑی اور متعدد ایمبولینسز فوری طور پر جائے وقوعہ پر روانہ کر دی گئیں۔
ریسکیو حکام کا کہنا ہے کہ بس میں تقریباً 50 افراد سوار تھے جن میں بچے، خواتین، بزرگ، دلہا اور دلہن بھی شامل تھے۔ حادثے کے بعد امدادی کارروائیوں کے دوران 20 شدید زخمی افراد کو بس سے نکالا گیا۔
ترجمان کے مطابق جاری ریسکیو آپریشن کے دوران 4 افراد کی لاشیں نکالی گئیں جن میں ایک بچہ بھی شامل ہے، جبکہ زخمیوں کو ابتدائی طبی امداد فراہم کرنے کے بعد قریبی اسپتال منتقل کر دیا گیا۔
ریسکیو حکام کے مطابق امدادی کارروائیاں مکمل ہونے تک علاقے کو گھیرے میں رکھا گیا جبکہ حادثے کی مزید تحقیقات جاری ہیں۔