روس کیساتھ جنگ کی تیاری سے متعلق نیٹو کے بیانات پر نظر رکھے ہوئے ہیں، سرگئی لاوروف

روسی وزیر خارجہ سرگئی لاوروف نے ماسکو میں مشرقی تیمور (Timor-Leste) کے وزیر خارجہ بینیڈیٹو فریتاس کے ساتھ دوطرفہ مذاکرات کے بعد مشترکہ پریس کانفرنس سے خطاب کرتے ہوئے کہا ہے کہ روس اپنے خلاف نیٹو کی عسکری تیاریوں اور بیانات کو مسلسل مانیٹر کر رہا ہے اور سیکیورٹی صورت حال پر گہری نظر رکھے ہوئے ہے। سرگئی لاوروف نے واضح کیا کہ روس اپنی سلامتی کو لاحق تمام خطرات سے آگاہ ہے اور ماسکو کے لیے سب سے اہم ترجیح یوکرین میں خصوصی فوجی آپریشن کے دوران صدر ولادیمیر پوتن کے مقرر کردہ اہداف کو حاصل کرنا اور مغرب سے ابھرنے والے چیلنجز کا سدِباب کرنا ہے।

نیٹو کے مشرقی سرحدوں کے سیکیورٹی منصوبوں کے بارے میں گفتگو کرتے ہوئے روسی وزیر خارجہ نے کہا کہ وہ مغربی بیانات کو فلسفیانہ انداز میں دیکھتے ہیں، تاہم صدر پوتن والڈائی فورم کے دوران واضح کر چکے ہیں کہ کیلینن گراڈ یا روس کے کسی بھی دیگر خطے پر حملے کا منہ توڑ اور حتمی جواب دیا جائے گا। مشرقِ وسطیٰ اور ایران کے گرد پھیلی کشیدگی پر تشویش کا اظہار کرتے ہوئے انہوں نے اس کی تمام تر ذمہ داری مغرب کی مداخلت پر عائد کی اور کہا کہ عالمی معاشی بحران سے نمٹنے کے لیے مصر، پاکستان، قطر اور سعودی عرب کی سفارتی و ثالثی کاوشیں انتہائی اہم ہیں। اس کے علاوہ ایشیا بحرالکاہل میں آسٹریلیا، امریکہ اور جاپان کے محدود بلاکس کی تشکیل کو آسیان کی شمولیت کے اصولوں کے خلاف قرار دیتے ہوئے اور افغانستان سے متعلق ماسکو فارمیٹ کے 8ویں اجلاس کا اعلامیہ جاری نہ ہونے پر ان کا کہنا تھا کہ ماسکو، اسلام آباد اور کابل کے تعلقات میں بہتری کے لیے مسلسل جدوجہد جاری رکھے گا۔