روس کی پاکستان، افغانستان سے اختلافات ختم کرنے کیلئے مذاکرات کی اپیل

روس کی وزارت خارجہ نے پاکستان اور افغانستان کے درمیان بڑھتی ہوئی سرحدی کشیدگی پر گہری تشویش کا اظہار کرتے ہوئے دونوں ممالک سے اپنے تمام اختلافات سفارتی اور سیاسی ذرائع سے حل کرنے کی اپیل کی ہے۔

روسی وزارت خارجہ کی جانب سے جاری کردہ ایک باضابطہ بیان میں پاک افغان سرحدی علاقوں میں ہونے والے حالیہ پرتشدد واقعات کو انتہائی افسوسناک قرار دیا گیا ہے۔ بیان میں اسلام آباد اور کابل پر زور دیا گیا ہے کہ وہ فوری طور پر مسلح تصادم کا خاتمہ کریں اور تمام متنازعہ امور کو پرامن مذاکرات کے ذریعے حل کرنے کی کوشش کریں۔

روسی حکام نے خطے کی صورتحال پر بات کرتے ہوئے کہا کہ اس نوعیت کی کشیدگی پورے خطے کے امن و استحکام کو متاثر کر سکتی ہے۔ روس نے دونوں برادر ممالک کے حکام سے تحمل کا مظاہرہ کرنے اور فوری طور پر میز پر بیٹھ کر بات چیت کا عمل شروع کرنے کی پرزور اپیل کی ہے۔