لاہور سمیت پنجاب کے مختلف علاقوں میں آندھی اور بارش کی پیشگوئی، پی ڈی ایم اے کا الرٹ جاری

لاہور: پنجاب ڈیزاسٹر مینجمنٹ اتھارٹی نے صوبے بھر میں گردوغبار، آندھی اور بارشوں کے حوالے سے الرٹ جاری کر دیا ہے۔ محکمہ کے مطابق آج شام سے 12 مئی تک لاہور سمیت پنجاب کے بیشتر اضلاع میں موسم خراب رہنے کا امکان ہے۔

ترجمان پی ڈی ایم اے کے مطابق راولپنڈی، مری، گلیات، اٹک، جہلم، چکوال، گجرانوالہ، سرگودھا، میانوالی، شیخوپورہ، گجرات، خوشاب اور منڈی بہاؤالدین میں بارشوں کی پیشگوئی کی گئی ہے۔

اسی طرح لاہور، سیالکوٹ، نارووال، فیصل آباد، جھنگ، ڈیرہ غازی خان اور گردونواح میں بھی بارش اور تیز ہواؤں کا امکان ظاہر کیا گیا ہے۔

پی ڈی ایم اے نے تمام کمشنرز اور ڈپٹی کمشنرز کو پیشگی اقدامات یقینی بنانے کی ہدایات جاری کر دی ہیں تاکہ کسی بھی ہنگامی صورتحال سے بروقت نمٹا جا سکے۔

ڈی جی پی ڈی ایم اے عمر جاوید نے شہریوں کو ہدایت کی ہے کہ آسمانی بجلی اور گرج چمک کے دوران کھلے مقامات پر جانے سے گریز کریں اور محفوظ جگہوں پر رہیں۔ انہوں نے کسانوں کو بھی موسمی صورتحال کے پیش نظر احتیاطی تدابیر اختیار کرنے کا مشورہ دیا۔

ڈی جی پی ڈی ایم اے کا کہنا تھا کہ شمالی علاقہ جات کا سفر کرنے والے سیاح محتاط رہیں جبکہ کسی بھی ہنگامی صورتحال میں پی ڈی ایم اے کی ہیلپ لائن 1129 پر رابطہ کیا جا سکتا ہے۔