پنجاب میں 27 نئے سہولت بازاروں کی تکمیل کیلئے جولائی کا ہدف مقرر

وزیراعلیٰ پنجاب مریم نواز شریف نے صوبے کے مختلف اضلاع میں 27 نئے سہولت بازاروں اور 13 ‘سہولت آن دی گو’ بازاروں کے قیام کی منظوری دے دی ہے، جس کا مقصد عوام کو اوپن مارکیٹ سے 40 فیصد کم نرخ پر اشیاء فراہم کرنا ہے۔ اس منصوبے سے سالانہ 9 کروڑ سے زائد شہری مستفید ہوں گے اور ساڑھے 8 لاکھ گھرانوں کو تقریباً 5 ارب 30 کروڑ روپے کی بچت ہوگی۔ نئے بازاروں میں نہ صرف سستی سبزیاں اور پھل دستیاب ہوں گے بلکہ دکانداروں کو مفت بجلی اور سکیورٹی جیسی مراعات بھی دی جائیں گی۔ وزیراعلیٰ نے واضح کیا کہ ان بازاروں میں بزرگ شہریوں کے لیے الگ کاؤنٹرز، فری ہوم ڈلیوری اور سی سی ٹی وی مانیٹرنگ جیسے جدید ترین انتظامات یقینی بنائے جائیں گے۔