وزیراعلی پنجاب مریم نوازکا طلبہ کو ایک لاکھ ای بائیکس دینے کا اعلان

وزیراعلیٰ پنجاب مریم نواز نے نوجوان طلبہ و طالبات کے لیے آسان اور سود سے پاک اقساط پر دوبارہ ‘ای بائیکس اسکیم’ متعارف کرانے کا بڑا فیصلہ کیا ہے، جس کے تحت ایک سال کے دوران 1 لاکھ الیکٹرک بائیکس فراہم کی جائیں گی۔

حکومت پنجاب کی جانب سے جاری کردہ تفصیلات کے مطابق، طلبہ کو ریلیف فراہم کرنے کے لیے ہر ای بائیک پر 70 ہزار روپے کی بھاری سبسڈی دی جائے گی۔ بائیک حاصل کرنے کے لیے طلبہ کو صرف 14 ہزار روپے ڈاؤن پیمنٹ (ابتدائی رقم) کرنا ہوگی، جس کے بعد وہ محض 2,100 روپے ماہانہ سود سے پاک آسان قسط ادا کریں گے۔

وزیراعلیٰ مریم نواز نے طالبات کے لیے ایک اور انقلابی اعلان کرتے ہوئے کہا کہ طالبات کی ای بائیکس کی ڈاؤن پیمنٹ اور رجسٹریشن فیس حکومتِ پنجاب خود برداشت کرے گی، اور طالبات کو بھی صرف 2,100 روپے ماہانہ سود سے پاک قسط ادا کرنا ہوگی۔ اس کے علاوہ پنجاب کے سرکاری ملازمین بھی آسان اقساط پر یہ ای بائیکس حاصل کرنے کے اہل ہوں گے۔ ایک اعلیٰ سطحی اجلاس کی صدارت کرتے ہوئے وزیراعلیٰ پنجاب نے ہدایت کی کہ صوبے میں مزید الیکٹرک بسیں، ای ٹیکسیاں، بائیکس اور ای تھری وہیلرز (الیکٹرک رکشے) ایک ساتھ متعارف کرائے جائیں۔ انہوں نے گرین ٹرانسپورٹ کے تحت اعلان کیا کہ آئندہ پانچ برسوں میں 5,000 الیکٹرک بسیں پنجاب بھر میں عوام کی خدمت اور ماحولیاتی آلودگی کے خاتمے کے لیے چلائی جائیں گی۔