پنجاب اسمبلی میں ایران امریکا جنگ بندی کے خیرمقدم کی قرارداد جمع

پنجاب اسمبلی میں امریکہ اور ایران کے درمیان دو ہفتوں کی تاریخی جنگ بندی کا خیرمقدم کرنے کے لیے ایک قرارداد جمع کرا دی گئی ہے۔ ذرائع کے مطابق یہ قرارداد مسلم لیگ (ن) کی رکنِ اسمبلی حنا پرویز بٹ کی جانب سے جمع کروائی گئی ہے، جس میں مشرقِ وسطیٰ میں امن کے قیام کے لیے پاکستان کی مخلصانہ کوششوں کو سراہا گیا ہے۔ قرارداد کے متن میں وزیراعظم شہباز شریف، وزیرِ خارجہ اسحاق ڈار اور چیف آف آرمی اسٹاف فیلڈ مارشل سید عاصم منیر کو ان کی کامیاب سفارت کاری پر زبردست خراجِ تحسین پیش کیا گیا ہے۔

قرارداد میں موقف اختیار کیا گیا ہے کہ پاکستان کی پرامن سفارتی کاوشوں کو آج پوری دنیا تسلیم کر رہی ہے اور یہ موجودہ حکومت کی ایک بڑی عالمی کامیابی ہے۔ متن کے مطابق، جس پاکستان کو ماضی میں عالمی سطح پر تنہائی کا شکار کرنے کی کوشش کی گئی تھی، آج وہی ملک دنیا کے بڑے فیصلوں میں کلیدی اور مؤثر کردار ادا کر رہا ہے۔ قرارداد میں مزید کہا گیا ہے کہ وزیراعظم شہباز شریف، اسحاق ڈار اور فیلڈ مارشل عاصم منیر اس کامیاب ثالثی کے بعد اسلامی دنیا کے ہیرو بن کر سامنے آئے ہیں۔ پنجاب اسمبلی کی اس قرارداد کے ذریعے ایوان نے امن کے قیام کے لیے وفاقی حکومت کے تمام فیصلوں کی مکمل تائید کا اظہار کیا ہے۔