صدر مملکت آصف زرداری کی روسی قیادت کو یومِ فتح پر مبارک باد

صدرِ مملکت آصف علی زرداری نے روسی فیڈریشن کے صدر ولادیمیر پوتن اور روسی عوام کو ‘یومِ فتح’ کے موقع پر مبارکباد پیش کی ہے۔ ایوانِ صدر سے جاری بیان کے مطابق صدر زرداری نے اپنے پیغام میں کہا کہ فسطائیت کے خلاف عظیم جنگ میں فتح، روسی عوام کی عالمی جدوجہد اور ان کی بے مثال قربانیوں کی ایک پُروقار یادگار ہے۔

صدر مملکت نے اس تاریخی کامیابی کو روسی قوم کی ہمت اور عالمی امن و سلامتی کے لیے ان کے کلیدی کردار کی علامت قرار دیا۔ انہوں نے نازی ازم کے خلاف جنگ میں جانیں قربان کرنے والے تمام افراد کو خراجِ عقیدت پیش کیا، جن میں برصغیر (موجودہ پاکستان) کے وہ سپاہی بھی شامل تھے جنہوں نے اتحادی افواج کے پلیٹ فارم سے خدمات انجام دیں۔

اپنے پیغام میں آصف علی زرداری نے مزید کہا کہ پاکستان روس کے ساتھ اپنے دوطرفہ تعلقات کو انتہائی قدر کی نگاہ سے دیکھتا ہے اور ایک منصفانہ، پرامن اور قواعد و ضوابط پر مبنی بین الاقوامی نظام کے لیے مشترکہ عزم کا اعادہ کرتا ہے۔ انہوں نے امید ظاہر کی کہ اس تاریخی فتح کا جذبہ دونوں ممالک کے درمیان تعاون، باہمی مفاہمت اور دوستی کے رشتوں کو مزید مستحکم کرے گا۔