وزیراعظم شہباز شریف علی خامنہ ای شہید کے جنازے میں شرکت کیلئے ایران روانہ

وزیراعظم محمد شہباز شریف ایران کے سپریم لیڈر آیت اللہ سید علی خامنہ ای کی آخری رسومات میں شرکت کے لیے ایک روزہ سرکاری دورے پر تہران روانہ ہو گئے ہیں۔

وزیراعظم دفتر سے جاری ہونے والے اعلامیے کے مطابق، وزیراعظم کے ہمراہ پاکستان کی سیاسی قیادت پر مشتمل ایک اعلیٰ سطح کا وفد بھی موجود ہے۔ اس وفد میں اسپیکر قومی اسمبلی سردار ایاز صادق، نائب وزیراعظم و وزیر خارجہ محمد اسحاق ڈار، وزیرِ اطلاعات و نشریات عطا اللہ تارڑ، پاکستان پیپلز پارٹی کے چیئرمین بلاول بھٹو زرداری، پیپلز پارٹی کے سیکرٹری جنرل نیّر حسین بخاری اور وزیرِاعلیٰ سندھ سید مراد علی شاہ شامل ہیں۔

وزیراعظم محمد شہباز شریف تہران میں ایران کے سپریم لیڈر کی آخری رسومات میں شریک ہوں گے۔ اس موقع پر وہ پاکستانی عوام اور حکومت کی جانب سے ایرانی قیادت، حکومت اور سوگوار خاندانوں سے دلی تعزیت اور گہرے رنج و غم کا اظہار کریں گے۔ وزیراعظم دورے کے دوران غم کی اس گھڑی میں برادر ایرانی قوم کے ساتھ پاکستان کی مکمل یکجہتی اور تائید کا اعادہ بھی کریں گے۔

سرکاری شیڈول کے مطابق، وزیراعظم شہباز شریف تہران میں آخری رسومات اور تعزیتی ملاقاتوں میں شرکت کے فوراً بعد اپنے اگلے مرحلے میں ایران سے ترکیہ کے شہر استنبول کے لیے روانہ ہوں گے۔