وزیراعظم کل سے ایران اور ترکیہ کے دورے پر روانہ ہونگے

وزیراعظم شہباز شریف جمعے سے اسلامی جمہوریہ ایران اور جمہوریہ ترکیہ کے سرکاری دورے پر روانہ ہوں گے۔ اس اہم دورے میں نائب وزیراعظم و وزیر خارجہ محمد اسحاق ڈار، وفاقی کابینہ کے دیگر ارکان اور اعلیٰ حکام بھی وزیراعظم کے ہمراہ ہوں گے۔

سرکاری اعلامیے کے مطابق وزیراعظم اپنے دورے کا آغاز برادر ملک ایران سے کریں گے، جہاں وہ مرحوم سپریم لیڈر آیت اللہ علی خامنہ ای کی نمازِ جنازہ اور تدفین کی تقریبات میں شرکت کریں گے۔ وزیراعظم شہباز شریف ایرانی قیادت اور سوگوار خاندانوں سے ملاقات کے دوران حکومت اور عوامِ پاکستان کی جانب سے گہری تعزیت کا اظہار کریں گے اور اس غم کی گھڑی میں برادر ملک ایران کے ساتھ پاکستان کی مکمل یکجہتی کا اعادہ کریں گے۔

ایران کا دورہ مکمل کرنے کے بعد وزیراعظم شہباز شریف، ترک صدر رجب طیب اردوان کی خصوصی دعوت پر استنبول روانہ ہوں گے، جہاں وہ دونوں ممالک کے درمیان دوطرفہ تعلقات کے تمام پہلوؤں پر تفصیلی تبادلہ خیال کریں گے۔ ان ملاقاتوں میں بالخصوص تجارت اور سرمایہ کاری کے شعبوں میں تعاون کو مزید فروغ دینے پر توجہ دی جائے گی جبکہ علاقائی امن و سلامتی سے متعلق اہم امور بھی زیرِ بحث آئیں گے۔

استنبول میں قیام کے دوران وزیراعظم پاکستان کی میزبانی میں منعقد ہونے والی ایک اہم بزنس کانفرنس سے بھی خصوصی خطاب کریں گے۔ اس کانفرنس کا بنیادی مقصد پاکستان کے خصوصی اقتصادی زونز، توانائی، تجارت، انفارمیشن ٹیکنالوجی اور نجکاری سمیت مختلف شعبوں میں تجارتی اور سرمایہ کاری کی صلاحیتوں کو دنیا کے سامنے اجاگر کرنا ہے۔ کانفرنس میں ترکیہ کی ممتاز کاروباری شخصیات، بڑے سرمایہ کاروں، اعلیٰ سرکاری حکام اور کاروباری برادری کے دیگر نمائندے شرکت کریں گے۔

اعلامیے میں واضح کیا گیا ہے کہ وزیراعظم کا ایران اور ترکیہ کا یہ دورہ دونوں برادر ممالک کے ساتھ پاکستان کے گہرے تاریخی، ثقافتی اور دیرینہ برادرانہ تعلقات کا منہ بولتا ثبوت ہے۔