پشاور زلمی پی ایس ایل 11 کی چیمپئن بن گئی، حیدرآباد کنگزمین کو 5 وکٹوں سے شکست

لاہور کے قذافی اسٹیڈیم میں کھیلے گئے پاکستان سپر لیگ الیون کے فائنل میں پشاور زلمی نے حیدرآباد کنگزمین کو 5 وکٹوں سے شکست دے کر دوسری مرتبہ ٹائٹل اپنے نام کرلیا۔

حیدرآباد کنگزمین نے پہلے بیٹنگ کرتے ہوئے مقررہ 18 اوورز میں 129 رنز بنائے اور پوری ٹیم آؤٹ ہوگئی۔ جواب میں پشاور زلمی نے مطلوبہ ہدف 16ویں اوور کی دوسری گیند پر 5 وکٹوں کے نقصان پر حاصل کرلیا۔

ابتدائی طور پر زلمی کی بیٹنگ مشکلات کا شکار رہی۔ محمد حارث 6 رنز، بابر اعظم بغیر کوئی رن بنائے، کوشل مینڈس 9 اور مائیکل 4 رنز پر آؤٹ ہوئے۔ تاہم ایرون ہارڈی اور عبدالصمد نے ذمہ دارانہ بیٹنگ کرتے ہوئے 85 رنز کی شراکت قائم کی اور ٹیم کو فتح کے قریب پہنچایا۔

ایرون ہارڈی 56 رنز بنا کر ناٹ آؤٹ رہے جبکہ عبدالصمد نے 48 رنز کی اننگز کھیلی۔ وننگ شاٹ فرحان یوسف نے کھیل کر ٹیم کو 9 سال بعد ٹائٹل جتوایا۔

حیدرآباد کنگزمین کی جانب سے محمد علی نے 3 وکٹیں حاصل کیں۔

فائنل میں ایرون ہارڈی کو بہترین کھلاڑی قرار دیا گیا جبکہ صفیان مقیم کو ٹورنامنٹ کا بہترین کھلاڑی منتخب کیا گیا۔