مدرز ڈے پر قومی ویمن ٹیم نے قوم کا سر فخر سے بلند کر دیا، محسن نقوی

لاہور: پاکستان کرکٹ بورڈ کے چیئرمین محسن نقوی نے مدرز ڈے کے موقع پر قومی خواتین کرکٹ ٹیم کی شاندار کارکردگی کو سراہتے ہوئے کہا ہے کہ پاکستان کی قابلِ فخر بیٹیوں نے زمبابوے ویمن ٹیم کو تین صفر سے شکست دے کر پوری قوم کا سر فخر سے بلند کر دیا۔

اپنے بیان میں محسن نقوی نے کہا کہ مدرز ڈے منانے کا اس سے خوبصورت انداز نہیں ہو سکتا کہ قومی ویمن ٹیم نے تاریخی کامیابی حاصل کرتے ہوئے متعدد بین الاقوامی ریکارڈز بھی اپنے نام کیے۔

انہوں نے کہا کہ یہ تاریخی فتح پاکستان کی تمام ماؤں کے نام ہے جبکہ قومی خواتین کھلاڑیوں نے اپنی ہمت، جذبے اور بہترین کھیل کے ذریعے مدرز ڈے پر شاندار خراجِ تحسین پیش کیا۔

چیئرمین پی سی بی نے قومی خواتین ٹیم کو ان کی عمدہ کارکردگی، فائٹنگ اسپرٹ اور کھیل کے میدان میں غیرمعمولی جذبے پر بھرپور مبارکباد پیش کرتے ہوئے کہا کہ پاکستان میں خواتین کرکٹ کا مستقبل انتہائی روشن ہے۔

محسن نقوی کا کہنا تھا کہ قومی ٹیم نے ملک و قوم کو خوشی اور فخر کا ایک یادگار لمحہ دیا ہے۔ انہوں نے قومی کھلاڑیوں کو مخاطب کرتے ہوئے کہا، “شاباش لڑکیو، پاکستان کو آپ پر فخر ہے۔”