شہدائے کربلا کو سلام، ملک بھر میں آج یوم عاشور عقیدت و احترام سے منایا جا رہا ہے

اسلام آباد/لاہور/کراچی/ملتان: شہدائے کربلا کی عظیم اور لازوال قربانی کی یاد میں آج ملک بھر میں یومِ عاشور (10 محرم الحرام) انتہائی عقیدت، احترام اور مذہبی جوش و جذبے کے ساتھ منایا جا رہا ہے۔ اس سلسلے میں کراچی، لاہور، راولپنڈی، ملتان، پشاور، کوئٹہ اور مظفر آباد سمیت ملک کے تمام چھوٹے بڑے شہروں سے شبیہ ذوالجناح، علم اور تعزیوں کے روایتی ماتمی جلوس برآمد ہونا شروع ہو گئے ہیں۔ لاہور میں نثار حویلی سے برآمد ہونے والا مرکزی جلوس اپنے روایتی راستوں پر گامزن ہے جہاں محلہ شیعاں میں اذانِ علی اکبرؑ ادا کی گئی، جبکہ یہ جلوس شام کو کربلا گامے شاہ پہنچ کر اختتام پذیر ہوگا۔ کراچی میں نشتر پارک میں مرکزی مجلس کے بعد جلوس برآمد کیا جا رہا ہے، اور کوئٹہ و پشاور میں بھی ماتمی دستے ماتم و نوحہ خوانی کرتے ہوئے اپنی منزلوں کی جانب رواں دواں ہیں۔ جلوسوں کے اختتام پر شامِ غریباں کی مجالس بپا کی جائیں گی جن میں ذاکرین واقعہ کربلا کے بعد اہل بیت پر آنے والے مصائب بیان کریں گے۔

یومِ عاشور کے موقع پر امن و امان کی صورتحال برقرار رکھنے کے لیے ملک بھر میں سیکیورٹی کے غیر معمولی اور انتہائی سخت انتظامات کیے گئے ہیں۔ تمام حساس شہروں میں پولیس، رینجرز اور پاک فوج کے دستے تعینات ہیں، جبکہ جلوس کے راستوں کو کنٹینرز اور رکاوٹیں کھڑی کر کے سیل کر دیا گیا ہے۔ کسی بھی ناخوشگوار واقعے سے نمٹنے کے لیے ملک کے مختلف اضلاع اور حساس علاقوں میں موبائل فون اور انٹرنیٹ سروس عارضی طور پر معطل کی گئی ہے اور دفعہ 144 کے تحت اسلحے کی نمائش پر مکمل پابندی عائد ہے۔ جلوس کے راستوں میں عزاداروں کے لیے دودھ، ٹھنڈے پانی اور شربت کی سبیلیں جبکہ طبی امداد کے لیے خصوصی کیمپ بھی قائم کیے گئے ہیں تاکہ عزاداروں کو ہر ممکن سہولت فراہم کی جا سکے۔